مارکو روبیو کی ایران کو سخت وارننگ، "معاہدہ نہ کیا تو بھاری قیمت چکانا پڑے گی"

منیلا: امریکی وزیرِ خارجہ مارکو روبیو نے ایران کو سخت پیغام دیتے ہوئے کہا ہے کہ اگر تہران نے اپنے طرزِ عمل میں تبدیلی نہ لائی اور معاہدے کی جانب پیش رفت نہ کی تو اسے ہر گزرتی رات کے ساتھ مزید بھاری قیمت چکانا پڑے گی۔

فلپائن کے دارالحکومت منیلا میں آسیان کانفرنس کے موقع پر صحافیوں سے گفتگو کرتے ہوئے مارکو روبیو نے دعویٰ کیا کہ ایران اس وقت معاہدہ کرنے کی کوشش کر رہا ہے، تاہم ایسا محسوس ہوتا ہے کہ وہ اب بھی کسی حتمی معاہدے کے لیے تیار نہیں۔ ان کا کہنا تھا کہ اگر ایران نے معاہدہ نہ کیا تو اسے اس کے نتائج بھگتنا ہوں گے۔

امریکی وزیرِ خارجہ نے الزام عائد کیا کہ ایران ماضی میں ہونے والے معاہدوں کی یا تو خلاف ورزی کرتا رہا ہے یا بعد میں ان کی شرائط تبدیل کرنے کی کوشش کرتا ہے، جس کے باعث عالمی برادری کا اعتماد متاثر ہوا ہے۔

یمن کی صورتحال پر بات کرتے ہوئے مارکو روبیو نے کہا کہ حوثی باغیوں کو ایران نے گمراہ کیا ہے، تاہم انہیں امید ہے کہ حوثی کشیدگی میں کمی لانے کے لیے مثبت اقدامات کریں گے۔

انہوں نے سعودی عرب کو امریکہ کا ایک اہم اسٹریٹیجک شراکت دار قرار دیتے ہوئے کہا کہ سعودی عرب یا کسی بھی دوسرے ملک کے ساتھ ممکنہ جوہری تعاون کے معاہدوں میں سخت حفاظتی اقدامات شامل ہوں گے، جبکہ ایسے تمام معاہدے امریکی کانگریس کی منظوری سے مشروط ہوں گے۔

علاقائی اور عالمی امور پر گفتگو کرتے ہوئے مارکو روبیو نے کہا کہ ایشیائی سمندری حدود میں چین کی سرگرمیاں تشویش کا باعث ہیں۔ انہوں نے یہ بھی بتایا کہ روسی وزیرِ خارجہ کے ساتھ ان کی کھل کر اور مثبت بات چیت ہوئی ہے اور امریکہ یوکرین جنگ کے خاتمے کے لیے تعمیری کردار ادا کرنے کے لیے تیار ہے۔