ایران نے آبنائے ہرمز مکمل طور پر کھولنے کیلئے امریکا کو 6 شرائط پیش کر دیں

ایران کی قومی سلامتی کونسل کے سیکرٹری ذوالقدر نے آبنائے ہرمز کو مکمل طور پر کھولنے کے لیے امریکا کے سامنے 6 شرائط پیش کردی ہیں۔

ایرانی حکام کے مطابق آبنائے ہرمز کی مکمل بحالی امریکا کی جانب سے ان شرائط پر عمل درآمد سے مشروط ہوگی۔

ایران کی 6 شرائط کیا ہیں؟

سیکرٹری قومی سلامتی کونسل ذوالقدر کے مطابق امریکا کو:

ایران کو کسی بھی وقت اور کسی بھی زبان میں دھمکانے سے گریز کرنا ہوگا اور ایرانی قوم کی توہین نہیں کرنا ہوگی۔

ایران اور اس کے اتحادیوں پر مسلط جنگ کو مستقل طور پر ختم کرنا ہوگا۔

ایرانی عوام کے منجمد اور ایران سے متعلق اثاثے غیر مشروط طور پر جاری کرنا ہوں گے۔

ایران کی بحری ناکہ بندی ختم کرکے امریکی افواج کو ایران کے اطراف سے ہٹانا ہوگا۔

ایران کو جنگ کے دوران پہنچنے والے نقصانات کا مکمل ہرجانہ ادا کرنا ہوگا۔

ایرانی عوام پر عائد غیر منصفانہ اور غیر قانونی پابندیاں ختم کرنا ہوں گی۔

امریکا نے رویہ نہ بدلا تو آبنائے ہرمز نہیں کھولی جائے گی

ذوالقدر نے واضح کیا کہ اگر امریکا نے اپنا رویہ تبدیل نہ کیا تو آبنائے ہرمز دوبارہ مکمل طور پر نہیں کھولی جائے گی۔

انہوں نے کہا کہ جنگ ہو یا مذاکرات، ایران اپنے ارادوں سے پیچھے نہیں ہٹے گا اور اپنے قومی مفادات کے تحفظ کے لیے مؤقف پر قائم رہے گا۔

ایرانی مؤقف کے مطابق آبنائے ہرمز کو مکمل طور پر کھولنے کا فیصلہ صرف بحری آمدورفت کے معاملے تک محدود نہیں بلکہ ایران اور امریکا کے درمیان وسیع تر تنازعات اور مطالبات سے بھی جڑا ہوا ہے۔