ٹرمپ کی پالیسیاں تضادات کا مجموعہ ہیں، ایران کا جواب عمل سے ہوگا: محمد رضا عارف

(تہران) ایرانی نائب صدر محمد رضا عارف نے کہا ہے کہ امریکی صدر ڈونلڈ ٹرمپ کی پالیسیاں تضادات کا مجموعہ ہیں اور ایران کا جواب لفظوں میں نہیں بلکہ عملی اقدامات سے دیا جائے گا۔

ایرانی نائب صدر محمد رضا عارف نے اپنے بیان میں کہا کہ ٹرمپ کے بیانات اور سوشل میڈیا پیغامات کی کوئی حیثیت نہیں، ایران اپنی حکمت عملی عملی اقدامات کے ذریعے واضح کرے گا۔

انہوں نے مزید کہا کہ نام نہاد امریکی بحری ناکہ بندی کو ایران نے مکمل طور پر ناکام بنا دیا ہے۔ محمد رضا عارف کے مطابق ناکہ بندی کے باوجود ایران کی تیل برآمدات میں دو سے تین گنا اضافہ ہوا، جو ایران کی کامیابی کا واضح ثبوت ہے۔

ایرانی نائب صدر نے کہا کہ کسی بھی قسم کی ہرزہ سرائی سے ایرانی قوم کے وقار کو نقصان نہیں پہنچایا جا سکتا اور ایران اپنے قومی مفادات کے تحفظ کیلئے مضبوطی سے کھڑا ہے۔