بھارتی گلوکار بادشاہ اور اداکارہ ایشا رِکھی کی شادی کی تصدیق، مداحوں میں خوشی کی لہر

(ممبئی) بھارتی پنجابی فلم انڈسٹری کی معروف اداکارہ اور ماڈل ایشا رِکھی نے بالآخر گلوکار اور ریپر بادشاہ کے ساتھ اپنی شادی کی خبروں کی تصدیق کر دی، جس کے بعد مداحوں کی جانب سے دونوں کو مبارکبادوں کا سلسلہ شروع ہو گیا ہے۔

اداکارہ نے یہ انکشاف انسٹاگرام پر منعقد کیے گئے ایک سوال و جواب سیشن کے دوران کیا، جہاں مداحوں نے ان کی نجی زندگی سے متعلق مختلف سوالات پوچھے۔ سب سے زیادہ زیرِ بحث سوال یہ تھا کہ اگر دونوں شادی کے بندھن میں بندھ چکے ہیں تو پھر وہ سوشل میڈیا پر ایک دوسرے کو فالو کیوں نہیں کرتے۔

اس سوال کا جواب دیتے ہوئے ایشا رِکھی نے مزاحیہ انداز اپنایا اور کہا کہ وہ اس قسم کے سوالات سے کافی تنگ آ چکی ہیں۔ انہوں نے واضح الفاظ میں کہا، "جی ہاں، میری شادی ہو چکی ہے، اب اصل سوال یہ ہے کہ ہم ایک دوسرے کو فالو کیوں نہیں کرتے۔"

اداکارہ نے مزید کہا کہ اس معاملے کی وضاحت ان کے شوہر، یعنی بادشاہ، کو دینی چاہیے۔ انہوں نے ہنستے ہوئے کہا، "پتی دیو (بادشاہ)، عوام کے پاس سوالات ہیں، براہِ کرم جلد از جلد جواب دیں۔"

ایک اور مداح نے سوال کیا کہ شادی کے باوجود انہوں نے کبھی بادشاہ کے ساتھ کوئی تصویر کیوں شیئر نہیں کی۔ اس پر ایشا رِکھی نے پہلی بار دونوں کی ایک نایاب مشترکہ تصویر بھی اپنے مداحوں کے ساتھ شیئر کر دی، جو دیکھتے ہی دیکھتے سوشل میڈیا پر وائرل ہو گئی۔

مداحوں کی بڑی تعداد نے اس جوڑے کے لیے نیک تمناؤں اور مبارکباد کا اظہار کیا، جبکہ کئی صارفین نے دونوں کی سادگی اور نجی زندگی کو میڈیا کی نظروں سے دور رکھنے کے فیصلے کو بھی سراہا۔

واضح رہے کہ ایشا رِکھی اور بادشاہ کی شادی کی افواہیں پہلی بار مارچ میں اس وقت سامنے آئی تھیں جب اداکارہ کی والدہ نے سوشل میڈیا پر چند تصاویر اور ویڈیوز شیئر کی تھیں۔ ان پوسٹس کو مداحوں نے شادی کی تقریبات سے جوڑا تھا، تاہم اس وقت دونوں فنکاروں کی جانب سے اس حوالے سے کوئی باضابطہ بیان جاری نہیں کیا گیا تھا۔