اسحاق ڈار اور بلاول بھٹو کے درمیان رابطہ، سنگل لارجسٹ پارٹی کو حکومت بنانے کا موقع دینے پر اتفاق

اسلام آباد: گلگت بلتستان اسمبلی انتخابات کے بعد حکومت سازی کے حوالے سے اہم پیش رفت سامنے آئی ہے۔ نائب وزیراعظم اور مسلم لیگ (ن) کے سینئر رہنما اسحاق ڈار نے پاکستان پیپلز پارٹی کے چیئرمین بلاول بھٹو زرداری سے رابطہ کیا، جس میں دونوں رہنماؤں نے اس بات پر اتفاق کیا کہ گلگت بلتستان میں سنگل لارجسٹ پارٹی کو حکومت بنانے کا حق حاصل ہوگا۔

ذرائع کے مطابق اسحاق ڈار نے بلاول بھٹو زرداری کو گلگت بلتستان انتخابات میں پیپلز پارٹی کی کامیابی پر مبارک باد دی۔ دونوں رہنماؤں کے درمیان ہونے والی گفتگو میں اس امر پر اتفاق کیا گیا کہ انتخابی نتائج کا احترام کرتے ہوئے سب سے بڑی جماعت کو حکومت سازی کا موقع دیا جائے گا۔

ذرائع کا کہنا ہے کہ اسحاق ڈار اور بلاول بھٹو زرداری نے گلگت بلتستان کے سیاسی اور انتظامی معاملات پر دونوں جماعتوں کے رہنماؤں کے درمیان مشاورت اور باہمی رابطے جاری رکھنے پر بھی اتفاق کیا۔

اس سے قبل وزیراعظم شہباز شریف نے بھی گلگت بلتستان انتخابات میں کامیابی پر صدر آصف علی زرداری کو مبارک باد دی تھی۔ ذرائع کے مطابق وزیراعظم نے خوشگوار انداز میں کہا کہ "نوجوان بلاول نے ہم سے بہتر انتخابی مہم چلائی"، جس پر صدر زرداری نے مسکراتے ہوئے جواب دیا، "آخر بیٹا کس کا ہے!"

واضح رہے کہ گلگت بلتستان اسمبلی کے 24 رکنی ایوان میں حکومت بنانے کے لیے 13 نشستیں درکار ہیں۔ غیر حتمی اور غیر سرکاری نتائج کے مطابق پاکستان پیپلز پارٹی 10 نشستوں کے ساتھ سب سے بڑی جماعت بن کر سامنے آئی ہے، جبکہ آزاد امیدواروں نے 7 نشستیں حاصل کی ہیں۔ مسلم لیگ (ن) 6 نشستوں کے ساتھ تیسرے نمبر پر ہے، جبکہ حکومت سازی کے لیے سیاسی مشاورت کا عمل جاری ہے۔