ٹرمپ کا اسرائیل لبنان جنگ بندی میں 3 ہفتوں کی توسیع کا اعلان

(واشنگٹن ڈی سی) امریکی صدر ڈونلڈ ٹرمپ نے اعلان کیا ہے کہ اسرائیل اور لبنان کے درمیان جاری جنگ بندی میں مزید تین ہفتوں کی توسیع کی جائے گی، جس کا مقصد خطے میں کشیدگی کم کرنا اور سفارتی کوششوں کو آگے بڑھانا ہے۔

صدر ٹرمپ نے اس حوالے سے اسرائیل اور لبنان کے سفیروں سے اہم ملاقاتیں بھی کیں، جن میں جنگ بندی کی صورتحال اور مستقبل کی حکمت عملی پر تبادلہ خیال کیا گیا۔

ذرائع کے مطابق صدر ٹرمپ جلد ہی اسرائیلی وزیر اعظم اور لبنانی صدر کی میزبانی کے منتظر ہیں تاکہ براہ راست بات چیت کے ذریعے خطے میں پائیدار امن کی راہ ہموار کی جا سکے۔

صدر ٹرمپ کا کہنا تھا کہ امریکا لبنان کے ساتھ مل کر کام کرے گا تاکہ وہ حزب اللہ جیسے خطرات سے محفوظ رہ سکے۔ انہوں نے اس عزم کا اظہار کیا کہ خطے میں استحکام کے لیے تمام ممکنہ اقدامات کیے جائیں گے۔

سیاسی مبصرین کے مطابق جنگ بندی میں توسیع اور بڑھتی سفارتی سرگرمیاں مشرق وسطیٰ میں کشیدگی کم کرنے کی ایک اہم کوشش قرار دی جا رہی ہیں، تاہم اس کے نتائج آنے والے ہفتوں میں واضح ہوں گے۔