آزاد کشمیر میں ریاست مخالف ایجنڈے کے خلاف پوری قوت سے قانون نافذ کریں گے، خواجہ آصف

اسلام آباد: وزیر دفاع خواجہ آصف نے کہا ہے کہ آزاد کشمیر میں ریاست مخالف ایجنڈے اور قانون سے بالاتر سرگرمیوں کے خلاف پوری قوت کے ساتھ قانون نافذ کیا جائے گا۔ انہوں نے کہا کہ جمہوری معاشرے میں اختلافی معاملات کا حل انتخابات اور عوامی رائے کے ذریعے ہی ممکن ہے، جبکہ تشدد اور قتل و غارت کا راستہ اختیار کرنے والوں کے عزائم کچھ اور ہوتے ہیں۔

سماجی رابطے کی ویب سائٹ ایکس پر جاری اپنے بیان میں خواجہ آصف نے کہا کہ آزاد کشمیر میں انتخابات قریب ہیں اور ایسے وقت میں تمام سیاسی اور اختلافی معاملات کو عوام کی عدالت میں لے جانا ہی جمہوری رویہ ہے۔ ان کا کہنا تھا کہ جو عناصر ووٹ اور جمہوری عمل کی بجائے طاقت اور تشدد کے ذریعے اپنی سوچ مسلط کرنا چاہتے ہیں، وہ عوامی رائے کا احترام نہیں کرتے۔

وزیر دفاع نے دعویٰ کیا کہ حالیہ واقعات میں پولیس اور سیکیورٹی اہلکاروں کو نشانہ بنایا گیا، انہیں شہید کیا گیا اور لاشوں کی بے حرمتی کے واقعات بھی سامنے آئے، جس سے ظاہر ہوتا ہے کہ بعض عناصر جمہوری راستہ اختیار کرنے کے بجائے انتشار اور بدامنی کو فروغ دینا چاہتے ہیں۔

خواجہ آصف نے مزید کہا کہ اگر کوئی گروہ قانون سے ماورا ہو کر ریاست مخالف ایجنڈے کے تحت تشدد مسلط کرنے کی کوشش کرے گا تو ریاست اپنی آئینی ذمہ داری ادا کرتے ہوئے پوری طاقت کے ساتھ قانون نافذ کرے گی۔ انہوں نے اس عزم کا اعادہ کیا کہ حکومت کشمیری عوام کو آزادانہ ماحول میں اپنی رائے کے اظہار اور جمہوری حقِ رائے دہی کے استعمال کا مکمل موقع فراہم کرے گی۔

وزیر دفاع کے مطابق قانون کی حکمرانی، امن و امان کا قیام اور شفاف انتخابی عمل ہی خطے میں استحکام اور عوامی اعتماد کی بنیاد ہیں، جبکہ تشدد اور انتشار کی کسی بھی کوشش کو قانون کے مطابق روکا جائے گا۔