محمود اچکزئی پی ٹی آئی قیادت سے ناراض، مردان جلسے میں شرکت نہ کرنے کی وجہ سامنے آگئی

(اسلام آباد) اپوزیشن لیڈر محمود اچکزئی اور پاکستان تحریک انصاف کی قیادت کے درمیان دوریاں پیدا ہوگئی ہیں، اہم فیصلوں پر اعتماد میں نہ لینے پر محمود اچکزئی ناراض ہوگئے۔

ذرائع کے مطابق 9 اور 19 اپریل کے جلسوں کے اعلان سے قبل محمود اچکزئی سے مشاورت نہیں کی گئی، جبکہ جلسوں کے اعلان کے بعد بعض رہنماؤں نے انہیں آگاہ کیا جس پر وہ ناراض ہوگئے۔ ذرائع کا کہنا ہے کہ اسی ناراضی کے باعث محمود اچکزئی نے مردان جلسے میں شرکت نہیں کی۔

دوسری جانب چیئرمین تحریک انصاف بیرسٹر گوہر معاملات سلجھانے کیلئے متحرک ہوگئے ہیں۔ بیرسٹر گوہر نے سہیل آفریدی سے ملاقات کی جس میں محمود اچکزئی سے مشاورت کرنے پر اتفاق کیا گیا۔

بیرسٹر گوہر نے نمائندہ خصوصی سے گفتگو کرتے ہوئے کہا کہ محمود اچکزئی اتحادی ہیں اور کسی قسم کی بداعتمادی نہیں ہے، وزیر اعلیٰ سے ملاقات ضرور ہوئی تاہم پارٹی کی اندرونی باتیں نہیں بتا سکتا۔

انہوں نے مزید کہا کہ ہم کوشش کرتے ہیں کہ ہر فیصلے میں محمود اچکزئی کی مشاورت شامل ہو، مجھے معلوم نہیں کہ محمود اچکزئی ناراض ہیں، اگر ایسا ہوا تو ناراضگی ختم کرائیں گے۔