ٹرمپ انتظامیہ کا بڑا فیصلہ:امریکا میں بڑا کریک ڈاؤن، ایک لاکھ 75 ہزار سے زائد ویزے منسوخ

ٹرمپ انتظامیہ نے غیر قانونی تارکین وطن اور جرائم میں ملوث افراد کے خلاف کارروائی تیز کرتے ہوئے اب تک ایک لاکھ 75 ہزار سے زائد امریکی ویزے منسوخ کر دیے ہیں۔

امریکی محکمہ خارجہ کی جانب سے ویزوں کی منسوخی کے نئے اعداد و شمار جاری کیے گئے ہیں۔ حکام کے مطابق مختلف وجوہات کی بنیاد پر بڑی تعداد میں افراد کے امریکی ویزے منسوخ کیے جا چکے ہیں۔

امریکی حکام کا کہنا ہے کہ حملہ، چوری، منشیات سے متعلق جرائم، نشے کی حالت میں ڈرائیونگ، جنسی جرائم، فراڈ اور بچوں سے بدسلوکی ویزے منسوخ کرنے کی اہم وجوہات میں شامل ہیں۔

اس کے علاوہ ایسے افراد کے خلاف بھی کارروائی کی گئی جن پر امیگریشن نظام کے غلط استعمال یا امریکی قومی سلامتی کو خطرے میں ڈالنے کے الزامات یا خدشات موجود تھے۔

امریکی محکمہ خارجہ کے مطابق صدر ڈونلڈ ٹرمپ اور وزیر خارجہ مارکو روبیو کی قیادت میں ویزا جانچ پڑتال اور منسوخی کا عمل جاری رہے گا۔

حکام کا کہنا ہے کہ امریکی حکومت امیگریشن نظام کو مزید سخت بنانے اور ایسے افراد کے خلاف کارروائی جاری رکھنے کے لیے پرعزم ہے جو جرائم میں ملوث ہوں یا قومی سلامتی کے لیے خطرہ سمجھے جائیں۔