معرکہ حق کی کامیابی کو ایک سال مکمل ہونے پر مسلح افواج کے سربراہان کی قوم اور افواج کو مبارک باد

پاک فوج، پاک فضائیہ اور پاک بحریہ کے سربراہان نے معرکۂ حق کی کامیابی کا ایک سال مکمل ہونے پر قوم، افسران اور جوانوں کو مبارکباد پیش کی ہے۔

سید عاصم منیر، ظہیر احمد بابر سدھو اور نوید اشرف نے مشترکہ تہنیتی پیغام میں کہا کہ یہ دن قومی یکجہتی، عسکری مہارت، جرات اور اتحاد کے پائیدار جذبے کی علامت ہے۔

آئی ایس پی آر کے مطابق سربراہان نے کہا کہ مسلح افواج ہمیشہ پاکستانی عوام کے شانہ بشانہ کھڑی رہی ہیں اور خدمت و قربانی کے جذبے کے ساتھ اپنا فرض ادا کرتی رہیں گی۔

بیان میں کہا گیا کہ معرکۂ حق ملکی تاریخ کا ایک اہم سنگ میل ثابت ہوا، جس نے قومی اعتماد کو مضبوط کیا اور پاکستان کو ایک ذمہ دار اور مستحکم علاقائی قوت کے طور پر اجاگر کیا۔

افواجِ پاکستان کے مطابق معرکۂ حق کے دوران پاکستان کے مؤثر ردعمل نے دشمن کی سازشوں، فالس فلیگ بیانیے اور گمراہ کن پروپیگنڈے کو بے نقاب کیا، جبکہ دشمن کو عالمی سطح پر سبکی کا سامنا کرنا پڑا۔

مشترکہ بیان میں کہا گیا کہ روایتی، ہائبرڈ اور پراکسی خطرات کے باوجود مسلح افواج نے زمینی، فضائی، بحری، سائبر اور معلوماتی محاذوں پر اعلیٰ پیشہ ورانہ صلاحیتوں کا مظاہرہ کیا۔

افواجِ پاکستان کے سربراہان نے اس عزم کا اعادہ کیا کہ پاکستان خطے میں امن و استحکام، خودمختاری کے تحفظ اور قومی سلامتی کیلئے ہر چیلنج کا مقابلہ کرنے کیلئے مکمل طور پر تیار ہے، جبکہ جنوبی ایشیا میں پائیدار امن کو بامعنی مذاکرات، باہمی احترام اور بین الاقوامی قوانین کی پاسداری سے مشروط قرار دیا گیا۔