مجتبیٰ خامنہ ای کے لیے فیلڈ مارشل کا خصوصی خط اور وزیراعظم کا پیغام لایا ہوں، محسن نقوی

(تہران)وفاقی وزیر داخلہ محسن نقوی اہم سفارتی مشن پر ایران کے دارالحکومت تہران پہنچ گئے، جہاں انہوں نے انکشاف کیا کہ وہ فیلڈ مارشل عاصم منیر کی جانب سے آیت اللہ مجتبیٰ خامنہ ای کے لیے ایک خصوصی خط اور وزیراعظم شہباز شریف کا خصوصی پیغام لے کر آئے ہیں۔

ایرانی خبر رساں ادارے تسنیم کے مطابق تہران میں میڈیا سے گفتگو کرتے ہوئے محسن نقوی نے کہا کہ وہ موجودہ علاقائی صورتحال کے تناظر میں یہ اہم پیغام اور خط ایرانی قیادت تک پہنچانے کے لیے ایران آئے ہیں۔

وزیر داخلہ نے مزید بتایا کہ یہ پیغام خطے میں جاری کشیدگی اور موجودہ حالات سے متعلق ہے، تاہم انہوں نے اس کے مندرجات کی مزید تفصیلات بیان نہیں کیں۔

یہ دورہ ایسے وقت میں ہو رہا ہے جب پاکستان خطے میں سفارتی سرگرمیوں کو تیز کرتے ہوئے ایران اور امریکہ کے درمیان کشیدگی کے خاتمے اور ممکنہ مذاکراتی عمل کو آگے بڑھانے کے لیے اہم کردار ادا کر رہا ہے۔

واضح رہے کہ محسن نقوی گزشتہ ماہ بھی ایک ہفتے کے دوران دو مرتبہ ایران کا دورہ کر چکے ہیں۔ ان دوروں کے دوران انہوں نے ایران کے صدر، پارلیمنٹ کے اسپیکر، وزیر خارجہ اور وزیر داخلہ سمیت اعلیٰ حکام سے ملاقاتیں کی تھیں۔

تجزیہ کاروں کے مطابق پاکستان کی حالیہ سفارتی کوششیں خطے میں استحکام، کشیدگی میں کمی اور مذاکرات کے ذریعے مسائل کے حل کی کوششوں کا حصہ ہیں، جس میں تہران کے ساتھ مسلسل رابطے اہمیت اختیار کر گئے ہیں۔