پاکستان اور امریکا کا دہشت گردی کے خلاف تعاون مزید مضبوط بنانے پر اتفاق

(واشنگٹن) واشنگٹن میں پاکستان اور امریکا کے درمیان انسدادِ دہشت گردی مذاکرات کا چوتھا دور منعقد ہوا، جس میں دونوں ممالک نے دہشت گردی کے خلاف باہمی تعاون کو مزید مضبوط بنانے اور مشترکہ حکمتِ عملی کو مؤثر بنانے پر اتفاق کیا۔

امریکی محکمہ خارجہ کی جانب سے جاری مشترکہ اعلامیے کے مطابق مذاکرات میں سرحدی سیکیورٹی کو مزید بہتر بنانے، دہشت گردوں کے نیٹ ورکس کو توڑنے اور انٹیلی جنس تعاون کو فروغ دینے سمیت مختلف اہم امور پر تفصیلی تبادلہ خیال کیا گیا۔

اعلامیے میں کہا گیا کہ پاکستان اور امریکا نے دہشت گرد تنظیموں داعش، القاعدہ، تحریک طالبان پاکستان (ٹی ٹی پی) اور بلوچ لبریشن آرمی (بی ایل اے) کے خلاف مشترکہ کارروائیوں اور تعاون جاری رکھنے کے عزم کا اعادہ کیا۔

دونوں ممالک نے اس بات پر بھی زور دیا کہ دہشت گردی کے خاتمے، علاقائی امن، استحکام اور خوشحالی کے لیے قریبی تعاون ناگزیر ہے، اور اس مقصد کے حصول کے لیے باہمی روابط اور شراکت داری کو مزید مضبوط بنایا جائے گا۔

انسدادِ دہشت گردی مذاکرات کا یہ دور دونوں ممالک کے درمیان سیکیورٹی تعاون کو فروغ دینے اور خطے میں درپیش مشترکہ خطرات سے نمٹنے کے لیے اہم پیش رفت قرار دیا جا رہا ہے۔