ٹرمپ کا دعویٰ: آبنائے ہرمز کل مکمل کھل جائے گی، ایران کے پاس معاہدے پر دستخط کا آخری موقع

واشنگٹن امریکی صدر ڈونلڈ ٹرمپ نے کہا ہے کہ آبنائے ہرمز کل مکمل طور پر کھل جائے گی اور ایران کے پاس مجوزہ معاہدے پر دستخط کرنے کا یہ آخری موقع ہے۔

وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ آبنائے ہرمز سے متعلق معاملات جلد منطقی انجام تک پہنچ جائیں گے اور یہ کوئی پیچیدہ مسئلہ نہیں ہے۔ ان کے مطابق اس اہم آبی گزرگاہ کا مکمل طور پر کھل جانا موجودہ سفارتی کوششوں کے پہلے مرحلے کی کامیابی ہوگا۔

ٹرمپ نے کہا کہ آبنائے ہرمز کھلنے کے بعد اگلے مرحلے میں ایران کے جوہری پروگرام سے متعلق مذاکرات کا آغاز کیا جائے گا۔ انہوں نے ایک بار پھر امریکی مؤقف دہراتے ہوئے کہا کہ امریکا نہیں چاہتا کہ ایران جوہری ہتھیار حاصل کرے۔

امریکی صدر کا کہنا تھا کہ آبنائے ہرمز سے گزرنے والے تجارتی جہازوں پر کسی قسم کی فیس عائد نہیں کی جائے گی، تاہم اگر کوئی دوسرا فریق ایسا کرنے کی کوشش کرے گا تو امریکا اس کا مناسب جواب دے گا۔

اس سے قبل امریکی وزیر خارجہ مارکو روبیو نے بھی کہا تھا کہ ایران اور عمان کے ساتھ آبنائے ہرمز میں جہاز رانی کی بحالی کے حوالے سے جاری مذاکرات میں اہم پیش رفت ہوئی ہے، تاہم ابھی تک کسی حتمی معاہدے پر اتفاق نہیں ہو سکا۔

واشنگٹن میں صحافیوں سے گفتگو کرتے ہوئے مارکو روبیو نے کہا تھا کہ مذاکرات درست سمت میں آگے بڑھ رہے ہیں اور تمام متعلقہ فریق قابل قبول حل تک پہنچنے کی کوشش کر رہے ہیں۔ ان کے مطابق اگرچہ بات چیت میں نمایاں پیش رفت ہوئی ہے، لیکن مذاکرات کا حتمی مرحلہ ابھی باقی ہے۔

امریکی وزیر خارجہ نے امید ظاہر کی تھی کہ جلد معاہدہ طے پا سکتا ہے، جس کے بعد آبنائے ہرمز کے ذریعے تجارتی اور بحری آمدورفت معمول پر آنے میں مدد ملے گی۔