اقوام متحدہ کا جنگ بندی میں توسیع کا خیر مقدم، پاکستان کی ثالثی کو سراہا گیا

(نیویارک) اقوام متحدہ کے مطابق سیکرٹری جنرل نے پاکستان کی ثالثی کی کوششوں کی مکمل حمایت کا اظہار کیا اور امید ظاہر کی کہ یہ اقدامات جامع اور دیرپا حل کی راہ ہموار کریں گے۔ انہوں نے کہا کہ موجودہ صورتحال ایران اور امریکا کے درمیان سفارتکاری کے لیے ایک اہم موقع فراہم کر رہی ہے۔

اقوام متحدہ کے ترجمان اسٹیفن دوجارک نے اپنے بیان میں کہا کہ جنگ بندی میں توسیع نہ صرف کشیدگی میں کمی لانے میں مددگار ثابت ہو سکتی ہے بلکہ دونوں ممالک کے درمیان اعتماد سازی کے عمل کو بھی تقویت دے گی۔

سیکرٹری جنرل کے دفتر نے تمام فریقین پر زور دیا ہے کہ وہ جنگ بندی کا احترام کریں، کسی بھی قسم کی اشتعال انگیزی سے گریز کریں اور مذاکرات کے عمل میں مثبت اور تعمیری کردار ادا کریں۔

بیان میں مزید کہا گیا کہ پاکستان کا کردار اس حوالے سے قابلِ تحسین ہے، جس نے فریقین کے درمیان مذاکرات میں سہولت کاری فراہم کی۔ اقوام متحدہ کو امید ہے کہ پاکستان کی یہ کوششیں خطے میں پائیدار امن کے قیام میں معاون ثابت ہوں گی۔