امریکا اور ایران مذاکرات میں اہم پیش رفت، 60 روزہ روڈ میپ پر اتفاق، پاکستان کردار ادا کرتا رہے گا: وزیراعظم شہباز شریف

(اسلام آباد) وزیراعظم شہباز شریف نے کہا ہے کہ امریکا اور ایران کے درمیان ’’اسلام آباد مفاہمتی یادداشت‘‘ کے تحت سوئٹزرلینڈ میں ہونے والے مذاکرات کے پہلے دور میں حوصلہ افزا پیش رفت ہوئی ہے اور فریقین حتمی معاہدے کے لیے 60 روزہ روڈ میپ پر متفق ہوگئے ہیں۔

وزیراعظم شہباز شریف نے اپنے بیان میں کہا کہ مذاکرات مثبت اور تعمیری ماحول میں منعقد ہوئے، جہاں دونوں ممالک نے تنازعات کے پرامن حل اور سفارتی عمل کو آگے بڑھانے کے عزم کا اظہار کیا۔

انہوں نے بتایا کہ مذاکرات کے دوران ایک اعلیٰ سطحی کمیٹی کے قیام پر بھی اتفاق کیا گیا ہے جو سیاسی سطح پر نگرانی کے ساتھ ساتھ آئندہ تکنیکی مذاکرات کی راہ ہموار کرے گی۔

وزیراعظم نے امریکا اور ایران کی قیادت کی جانب سے تعمیری مکالمے کے تسلسل کو سراہتے ہوئے کہا کہ یہ پیش رفت خطے اور دنیا میں امن و استحکام کے لیے اہم ثابت ہوسکتی ہے۔

شہباز شریف نے مذاکراتی عمل میں تعاون کرنے والے دوست ممالک کا شکریہ ادا کرتے ہوئے خاص طور پر قطر کے کردار کو سراہا، جس نے مذاکرات کے لیے سازگار ماحول پیدا کرنے میں معاونت کی۔ انہوں نے مذاکرات کی میزبانی میں سہولت فراہم کرنے پر سوئس حکومت کا بھی شکریہ ادا کیا۔

وزیراعظم نے فیلڈ مارشل عاصم منیر کی کاوشوں کو خراجِ تحسین پیش کرتے ہوئے کہا کہ ان کی انتھک محنت، عزم اور مستقل مزاجی اس پیش رفت میں اہم رہی۔ انہوں نے نائب وزیراعظم و وزیر خارجہ اسحاق ڈار، وزارت خارجہ کی ٹیم اور وزیر داخلہ محسن نقوی کی سفارتی اور انتظامی کوششوں کو بھی سراہا۔

انہوں نے اس عزم کا اعادہ کیا کہ پاکستان خطے اور دنیا میں امن کے فروغ کے لیے مذاکرات اور سفارت کاری کے ذریعے اپنا مخلصانہ کردار ادا کرتا رہے گا اور امریکا و ایران کے درمیان مثبت پیش رفت کی حمایت جاری رکھے گا۔