پٹرولیم لیوی میں 80 روپے کمی، پٹرول 378 روپے فی لیٹر مقرر

(اسلام آباد )قوم سے خطاب کرتے ہوئے وزیراعظم شہباز شریف نے کہا کہ مشرقِ وسطیٰ میں جاری جنگ کے باعث عالمی منڈی میں تیل کی قیمتوں میں غیر معمولی اضافہ ہوا ہے جس کے اثرات دنیا بھر کی معیشتوں پر پڑ رہے ہیں، جبکہ پاکستان بھی اس بحران سے شدید متاثر ہو رہا ہے۔

انہوں نے کہا کہ حکومت نے گزشتہ تین ہفتوں کے دوران عالمی مارکیٹ میں قیمتوں میں اضافے کا بوجھ عوام پر منتقل نہیں کیا اور اس مقصد کے لیے قومی خزانے سے 129 ارب روپے خرچ کیے گئے۔

وزیراعظم نے ٹرانسپورٹ اور زراعت کے شعبوں کے لیے خصوصی ریلیف پیکج کا بھی اعلان کیا۔ ان کے مطابق گڈز اور پبلک ٹرانسپورٹ کے شعبے میں مال بردار گاڑیوں کو 100 روپے فی لیٹر سبسڈی فراہم کی جائے گی۔ اس کے علاوہ چھوٹے ٹرکوں کو ماہانہ 70 ہزار روپے جبکہ بڑے ٹرکوں کو 80 ہزار روپے سبسڈی دی جائے گی۔

انہوں نے مزید اعلان کیا کہ پبلک ٹرانسپورٹ بسوں کو ایک لاکھ روپے ماہانہ مالی امداد دی جائے گی جبکہ زراعت کے شعبے کو سہارا دینے کے لیے چھوٹے کسانوں کو 1500 روپے فی ایکڑ کے حساب سے امداد فراہم کی جائے گی۔ وزیراعظم نے یہ بھی واضح کیا کہ پاکستان ریلوے کی اکانومی کلاس کے کرایوں میں اضافہ نہیں کیا جائے گا۔

واضح رہے کہ اس سے قبل حکومت نے پٹرول کی قیمت میں 137 روپے 23 پیسے جبکہ ڈیزل کی قیمت میں 184 روپے فی لیٹر اضافہ کیا تھا، جس کے بعد پٹرول کی قیمت 458 روپے 40 پیسے اور ڈیزل 520 روپے 35 پیسے فی لیٹر تک پہنچ گئی تھی۔