اسلام آباد: ایچ 9 اتوار بازار میں آگ، 335 دکانیں اور اسٹالز جل گئے

اسلام آباد کے سیکٹر ایچ 9 میں واقع اتوار بازار میں لگنے والی شدید آگ کے نتیجے میں 335 دکانیں اور اسٹالز جل کر خاکستر ہو گئے، جبکہ ریسکیو ٹیموں نے کئی گھنٹوں کی جدوجہد کے بعد آگ پر قابو پا لیا۔

ریسکیو حکام کے مطابق آگ شارٹ سرکٹ کے باعث بھڑکی، تاہم دکانوں میں موجود بیٹریوں کے پھٹنے سے آگ کی شدت میں غیر معمولی اضافہ ہوا جس کے باعث شعلے تیزی سے مختلف حصوں تک پھیل گئے۔

اطلاع ملتے ہی ریسکیو اور فائر بریگیڈ کی متعدد گاڑیاں موقع پر پہنچ گئیں اور آگ بجھانے کا آپریشن شروع کیا گیا۔ کئی گھنٹوں کی مسلسل کوششوں کے بعد آگ پر قابو پا لیا گیا، جبکہ متاثرہ علاقے میں کولنگ کا عمل جاری ہے تاکہ دوبارہ آگ بھڑکنے کے خدشات کو ختم کیا جا سکے۔

ریسکیو حکام کا کہنا ہے کہ آتشزدگی کے نتیجے میں مجموعی طور پر 335 دکانیں اور اسٹالز متاثر ہوئے ہیں، جس سے تاجروں کو بھاری مالی نقصان پہنچا ہے۔

حکام کے مطابق خوش آئند بات یہ ہے کہ واقعے میں کسی جانی نقصان کی اطلاع موصول نہیں ہوئی۔ تاہم نقصانات کے تخمینے اور واقعے کی مزید تحقیقات کا عمل جاری ہے۔

متاثرہ دکانداروں نے حکومت سے فوری امداد اور نقصانات کے ازالے کے لیے خصوصی پیکیج کا مطالبہ کیا ہے۔