ڈونلڈ ٹرمپ کا دورہ چین ، تاریخی تعاون ہی مشترکہ مستقبل کی ضمانت ہے: شی جن پنگ

چینی صدر نے امریکی صدر کے اعزاز میں دیے گئے ظہرانے کی تقریب سے خطاب کرتے ہوئے کہا کہ صدر ٹرمپ کو چین میں خوش آمدید کہنا باعثِ مسرت ہے۔ انہوں نے کہا کہ چین کی ترقی اور "امریکا گریٹ اگین" کا نعرہ ایک ساتھ آگے بڑھ سکتے ہیں۔

شی جن پنگ نے بتایا کہ ان کی صدر ٹرمپ کے ساتھ تمام اہم امور پر تفصیلی گفتگو ہوئی، جبکہ دونوں ممالک نے اسٹریٹجک تعلقات کو مزید مضبوط بنانے پر اتفاق کیا ہے۔ ان کا کہنا تھا کہ چین اور امریکا کے تعلقات دونوں ممالک کے مفاد میں ہیں۔

چینی صدر نے کہا کہ دنیا کے آٹھ ارب لوگوں کے بہتر مستقبل کیلئے دونوں طاقتوں کو مشترکہ ذمہ داری ادا کرنا ہوگی اور تعاون کے ذریعے عالمی استحکام کو فروغ دینا ہوگا۔

دوسری جانب امریکی صدر ڈونلڈ ٹرمپ نے اپنے خطاب میں چینی مہمان نوازی کو تاریخی قرار دیتے ہوئے کہا کہ چینی صدر کے ساتھ انتہائی مثبت اور تعمیری بات چیت ہوئی ہے۔ انہوں نے کہا کہ چین کے ساتھ تعلقات مسلسل بہتر ہو رہے ہیں اور دونوں ممالک کے پاس خوشحالی سے بھرپور مستقبل تعمیر کرنے کا اہم موقع موجود ہے۔