برطانوی وزیراعظم کیئر اسٹارمر کے مستعفی ہونے کی قیاس آرائیاں، کابینہ میں شدید دباؤ

برطانوی وزیراعظم کیئر اسٹارمر کے مستعفی ہونے کی قیاس آرائیاں زور پکڑ گئی ہیں، جبکہ اطلاعات ہیں کہ آج ہونے والے کابینہ اجلاس میں ان پر عہدہ چھوڑنے کے لیے شدید دباؤ ڈالا جا سکتا ہے۔

برطانوی میڈیا رپورٹس کے مطابق حالیہ بلدیاتی انتخابات میں شکست کے بعد حکمران لیبر پارٹی اندرونی بحران کا شکار ہوگئی ہے۔ پارٹی کے اہم رہنماؤں اور کابینہ اراکین نے وزیراعظم سے مستعفی ہونے یا قیادت چھوڑنے کے لیے واضح ٹائم لائن دینے کا مطالبہ کیا ہے۔

رپورٹس کے مطابق استعفے کا مطالبہ کرنے والوں میں نائب وزیراعظم ڈیوڈ لیمی، وزیر خارجہ ایویٹ کوپر، وزیر داخلہ شبانہ محمود سمیت کئی اہم وزرا شامل ہیں۔

میڈیا ذرائع کا کہنا ہے کہ اب تک تقریباً 70 لیبر ارکان پارلیمنٹ وزیراعظم کیئر اسٹارمر سے مستعفی ہونے کا مطالبہ کر چکے ہیں، جبکہ نئے پارٹی لیڈر کے انتخاب کے لیے باضابطہ تحریک پیش کرنے کو 81 ارکان کی حمایت درکار ہوگی۔

دوسری جانب آج 5 پارلیمانی سیکریٹریز بھی اپنے عہدوں سے استعفی دے چکے ہیں، جبکہ مزید وزرا کے استعفوں کا بھی امکان ظاہر کیا جا رہا ہے۔

سیاسی تجزیہ کاروں کے مطابق آئندہ چند گھنٹے برطانوی سیاست کے لیے انتہائی اہم ثابت ہو سکتے ہیں، اور کابینہ اجلاس کے بعد صورتحال مزید واضح ہونے کی توقع ہے۔