ایران کے ساتھ جنگ ختم ہونے کے قریب ہے، ایران معاہدہ چاہتا ہے: ٹرمپ

(واشنگٹن) امریکی صدر ڈونلڈ ٹرمپ نے دعویٰ کیا ہے کہ ایران کے ساتھ جاری کشیدگی اور جنگ اختتام کے قریب ہے اور ایران کسی بھی صورت معاہدہ کرنا چاہتا ہے۔

ڈونلڈ ٹرمپ نے کہا کہ وہ اس جنگ کو اختتام کے بہت قریب سمجھتے ہیں اور صورتحال میں مثبت پیشرفت ہو رہی ہے۔ انہوں نے کہا کہ ایران معاہدہ کرنا چاہتا ہے اور مذاکرات کے ذریعے مسئلے کے حل کی کوشش جاری ہے۔

ڈونلڈ ٹرمپ نے واضح کیا کہ وہ ایران کو کسی صورت جوہری ہتھیار حاصل کرنے کی اجازت نہیں دیں گے۔ ان کا کہنا تھا کہ ایران کے ایٹمی طاقت بننے سے عالمی توازن متاثر ہو سکتا ہے اور خطے میں مزید کشیدگی پیدا ہو گی۔

انہوں نے مزید کہا کہ اگر وہ مداخلت نہ کرتے تو ایران اس وقت جوہری ہتھیار حاصل کر چکا ہوتا۔ ان کے مطابق صورتحال کو بدلنے کیلئے فوری اقدامات کرنا ضروری تھے۔

امریکی صدر نے دعویٰ کیا کہ حالیہ کشیدگی کے بعد ایران کو تعمیر نو کیلئے تقریباً 20 سال درکار ہوں گے۔ انہوں نے کہا کہ امریکا نے خطے میں استحکام کیلئے اہم کردار ادا کیا اور مستقبل میں بھی امن کیلئے کوششیں جاری رکھے گا۔