ایران نے معاہدہ نہ کیا تو امریکا دوبارہ کارروائی کیلئے تیار، امریکی وزیر جنگ

(واشنگٹن)امریکی وزیر جنگ پیٹ ہیگسیتھ نے ایران کو سخت وارننگ دیتے ہوئے کہا ہے کہ اگر ایران نے معاہدہ نہ کیا تو امریکا دوبارہ فوجی کارروائی کیلئے تیار ہے اور آبنائے ہرمز کو کھلوانے کیلئے ایران کا انفراسٹرکچر تباہ کیا جا سکتا ہے۔

نیوز بریفنگ کے دوران امریکی وزیر جنگ نے کہا کہ امریکا پہلے کی طرح مضبوط ہے اور ایران کی بحری، فضائی اور میزائل صلاحیتوں کو شدید نقصان پہنچایا جا چکا ہے۔ انہوں نے کہا کہ ایران کیلئے واضح پیغام ہے کہ امریکا اس کی تمام سرگرمیوں پر نظر رکھے ہوئے ہے۔

پیٹ ہیگسیتھ نے دعویٰ کیا کہ ایران بمباری سے تباہ شدہ میزائل لانچرز کو دوبارہ فعال کرنے کی کوشش کر رہا ہے تاہم امریکا کو معلوم ہے کہ ایران اپنے فوجی اثاثے کہاں منتقل کر رہا ہے۔

انہوں نے کہا کہ ایران کسی صورت جوہری ہتھیار حاصل نہیں کر سکتا اور اس حوالے سے امریکا کا مؤقف واضح ہے۔ امریکی وزیر جنگ کے مطابق امریکا کی مذاکراتی ٹیم ایران کے ساتھ بات چیت جاری رکھے ہوئے ہے تاہم معاہدہ نہ ہونے کی صورت میں تمام آپشنز موجود ہیں۔

پیٹ ہیگسیتھ نے آبنائے ہرمز کے حوالے سے کہا کہ اگر ایران نے آبی گزرگاہ کو کھلا نہ رکھا تو امریکا ضروری اقدامات کرے گا اور اس مقصد کیلئے ایران کے انفراسٹرکچر کو نشانہ بنایا جا سکتا ہے۔

انہوں نے مزید کہا کہ ایران امریکا کی فوجی صلاحیت کا مقابلہ نہیں کر سکتا اور امریکا ضرورت پڑنے تک ناکہ بندی برقرار رکھے گا۔ امریکی وزیر جنگ نے تجارتی جہازوں کو دھمکیوں کو "قزاقی" قرار دیتے ہوئے کہا کہ عالمی تجارت کے تحفظ کیلئے امریکا اقدامات جاری رکھے گا۔