شہباز شریف کی صدر ٹرمپ سے ایران کے معاملے پر مہلت میں توسیع کی اپیل

(اسلام آباد)اپنے بیان میں وزیرِ اعظم نے کہا کہ خطے میں جاری تنازع کے حل کے لیے سفارتی کوششیں تیزی، مضبوطی اور مؤثر انداز میں آگے بڑھ رہی ہیں اور توقع ہے کہ جلد ٹھوس نتائج سامنے آ سکتے ہیں۔ انہوں نے زور دیا کہ سفارتکاری کو کامیاب ہونے کا موقع دینے کے لیے مہلت میں توسیع نہایت ضروری ہے۔

شہباز شریف نے ایران سے بھی اپیل کی کہ وہ خیر سگالی کے جذبے کے تحت آبنائے ہرمز کو دو ہفتوں کے لیے کھول دے تاکہ کشیدگی میں کمی لائی جا سکے اور مذاکرات کے لیے سازگار ماحول پیدا ہو۔

وزیرِ اعظم نے تمام متحارب فریقین پر زور دیا کہ وہ دو ہفتوں کے لیے مکمل جنگ بندی کریں تاکہ سفارتی عمل کو نتیجہ خیز بنانے میں مدد مل سکے۔ انہوں نے کہا کہ یہ اقدام خطے میں دیرپا امن اور استحکام کے لیے انتہائی اہم ثابت ہو سکتا ہے۔

انہوں نے مزید کہا کہ پاکستان خطے میں امن کے قیام کے لیے اپنی مخلصانہ کوششیں جاری رکھے گا اور تمام فریقین سے تحمل اور دانشمندی کا مظاہرہ کرنے کی اپیل کرتا ہے۔

یاد رہے کہ صدر ٹرمپ نے ایران کی شہری تنصیبات تباہ کرنے کی آج رات کی ڈیڈ لائن دے رکھی ہے