ٹرمپ کی ایران کو نئی دھمکی، جلد امن معاہدہ نہ ہوا تو نتائج بہت برے ہوں گے

(واشنگٹن ڈی سی )فرانسیسی نشریاتی ادارے کو دیے گئے ٹیلیفونک انٹرویو میں صدر ٹرمپ نے کہا کہ ایران کے مفاد میں ہے کہ وہ فوری طور پر معاہدے کی طرف بڑھے۔ ان کا کہنا تھا کہ واشنگٹن مذاکرات کے لیے تیار ہے، تاہم تہران کو سنجیدگی کا مظاہرہ کرنا ہوگا۔

صدر ٹرمپ نے اپنے سوشل میڈیا پلیٹ فارم ٹروتھ سوشل پر ایک تصویر بھی شیئر کی، جس پر “This is calm before the storm” یعنی “یہ طوفان سے پہلے کا سکون ہے” درج تھا۔ بظاہر مصنوعی ذہانت سے تیار کی گئی اس تصویر میں ٹرمپ کو کیمرے کی جانب انگلی اٹھائے دکھایا گیا جبکہ پس منظر میں طوفانی سمندر اور جنگی بحری جہاز نظر آ رہے تھے، جن میں بعض جہازوں پر ایرانی پرچم بھی لہرا رہے تھے۔

اس سے قبل بھی امریکی صدر ایران کے حوالے سے سخت بیانات دے چکے ہیں۔ ایک حالیہ گفتگو میں انہوں نے کہا تھا کہ “جب بھی ہم ڈیل کے قریب پہنچتے ہیں تو اگلے دن لگتا ہے جیسے کوئی بات ہی نہیں ہوئی، ان کے ساتھ کوئی مسئلہ ہے۔”

صحافیوں سے گفتگو کرتے ہوئے صدر ٹرمپ نے ایران کے جوہری پروگرام پر بھی بات کی۔ ان کا کہنا تھا کہ اگر ایران 20 سال کے لیے اپنا جوہری پروگرام معطل کرنے پر آمادہ ہو تو امریکا کو اس پر اعتراض نہیں، لیکن ایران کا عزم حقیقی اور قابلِ اعتماد ہونا چاہیے۔

امریکی صدر نے چین کے صدر شی جن پنگ کے ساتھ ہونے والی گفتگو کا ذکر کرتے ہوئے کہا کہ دونوں رہنماؤں کے درمیان جوہری ہتھیاروں میں کمی اور تائیوان کے معاملے پر تبادلہ خیال ہوا۔

ٹرمپ نے واضح کیا کہ تائیوان سے متعلق امریکی پالیسی میں کوئی تبدیلی نہیں آئی اور انہیں فی الحال تائیوان پر کسی بڑے تنازع کا خدشہ نہیں۔ انہوں نے یہ بھی کہا کہ امریکا نے ابھی تک تائیوان کو مزید ہتھیار فراہم کرنے کی منظوری نہیں دی۔

علاوہ ازیں صدر ٹرمپ نے جنوبی ایشیا کی صورتحال پر بات کرتے ہوئے کہا کہ وہ جنگ بندی کے حامی نہیں تھے، تاہم دیگر ممالک کے اصرار پر اس پر آمادگی ظاہر کی گئی۔ انہوں نے پاکستان کی قیادت کو سراہتے ہوئے کہا کہ پاکستان کے وزیراعظم اور فیلڈ مارشل نے کشیدگی کم کرنے میں اہم کردار ادا کیا۔