ٹرمپ کا بڑا بیان: ایران کے حملے سے جنگ دوبارہ شروع ہو سکتی ہے، جوہری معاہدے پر بھی اہم اشارے

(واشنگٹن) امریکی صدر ڈونلڈ ٹرمپ نے ایران کے ساتھ جاری کشیدگی، جوہری پروگرام اور مشرق وسطیٰ کی صورتحال پر اہم بیانات دیتے ہوئے کہا ہے کہ ایران کی جانب سے امریکی فوج پر براہ راست حملہ جنگ کے دوبارہ آغاز کا جواز بن سکتا ہے۔

وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ ایران کے ساتھ ممکنہ جوہری معاہدے کے تحت تہران کو جوہری ہتھیار رکھنے کی اجازت نہیں ہوگی۔ انہوں نے یہ بھی کہا کہ ایران کے ساتھ معاہدہ طے پانے کی صورت میں آبنائے ہرمز کو فوری طور پر کھول دیا جائے گا، جس سے عالمی تجارت اور توانائی کی منڈیوں کو استحکام مل سکتا ہے۔

امریکی صدر کا کہنا تھا کہ وہ اس وقت ایرانی سپریم لیڈر سے ملاقات کے خواہاں نہیں، تاہم اگر دونوں ممالک کے درمیان معاہدہ طے پا جاتا ہے تو ایسی ملاقات ممکن ہو سکتی ہے۔ ایک سوال کے جواب میں انہوں نے کہا کہ ایران کے ساتھ مجوزہ معاہدے کی تفصیلات جلد سامنے آ جائیں گی۔

لبنان کی صورتحال پر بات کرتے ہوئے ٹرمپ نے کہا کہ خطے میں امن کا قیام لبنان کے مفاد میں ہے اور وہاں کی صورتحال پر مسلسل نظر رکھنے کی ضرورت ہے۔ انہوں نے دعویٰ کیا کہ حزب اللہ سے بھی لبنان کی صورتحال کے حوالے سے گفتگو ہوئی ہے۔

روس اور یوکرین جنگ کے بارے میں امریکی صدر نے کہا کہ تنازع کے حل کیلئے مصالحتی کوششیں ناگزیر ہیں۔ ان کے مطابق اگر روسی صدر ولادیمیر پیوٹن اور یوکرینی صدر وولودیمیر زیلنسکی براہ راست ملاقات کریں تو یہ امن کی جانب ایک مثبت پیش رفت ہو سکتی ہے۔

دوسری جانب امریکی میڈیا رپورٹس میں دعویٰ کیا گیا ہے کہ صدر ٹرمپ اپنے قریبی مشیروں کو واضح کر چکے ہیں کہ وہ ایران کے ساتھ موجودہ جنگ بندی کو ختم کرنے کے خواہاں نہیں، جب تک کہ ایران براہ راست امریکی فوجیوں کو نشانہ نہ بنائے۔

وال اسٹریٹ جرنل کی رپورٹ کے مطابق ٹرمپ انتظامیہ مشرق وسطیٰ میں ایک وسیع علاقائی جنگ سے گریز کرنا چاہتی ہے اور محدود نوعیت کی کشیدگی کو برداشت کرنے پر آمادہ دکھائی دیتی ہے تاکہ خطے میں بڑے پیمانے پر تصادم سے بچا جا سکے۔