ٹرمپ کا دعویٰ: ایران شدید کمزور ہو چکا، مذاکرات میں جلدی ہمیں نہیں ایران کو تھی

واشنگٹن: امریکی صدر ڈونلڈ ٹرمپ نے کہا ہے کہ جنگ کے نتیجے میں ایران شدید کمزور ہو چکا ہے اور مذاکرات کے لیے جلدی امریکہ کو نہیں بلکہ ایران کو تھی۔

سوشل میڈیا پر جاری اپنے بیان میں صدر ٹرمپ نے دعویٰ کیا کہ ایران اب پہلے جیسی عسکری صلاحیت نہیں رکھتا۔ ان کا کہنا تھا کہ ایران کے پاس نہ مؤثر فضائیہ باقی رہی ہے، نہ بحریہ، نہ مضبوط دفاعی نظام اور نہ ہی کوئی دوسری قابلِ ذکر عسکری طاقت موجود ہے۔

ڈونلڈ ٹرمپ نے اپنے سیاسی مخالفین کو تنقید کا نشانہ بناتے ہوئے کہا کہ بعض ڈیموکریٹ رہنما یہ تاثر دینے کی کوشش کر رہے ہیں کہ ایران پہلے سے بہتر حالت میں ہے، جو حقائق کے منافی ہے۔ انہوں نے کہا کہ مذاکرات کے حوالے سے امریکہ نے کسی قسم کی جلد بازی نہیں دکھائی بلکہ ایران خود جلد از جلد پیش رفت کا خواہاں تھا۔

امریکی صدر نے مزید کہا کہ امریکہ طے شدہ 60 روزہ مدت مکمل کرے گا اور ایران کو کسی قسم کی مالی رعایت یا رقم فراہم نہیں کی جائے گی۔

دوسری جانب ایران نے لبنان پر اسرائیلی حملوں اور اسرائیلی حکام کے بیانات پر شدید ردعمل ظاہر کیا ہے۔

ایرانی وزیر خارجہ نے اسرائیلی وزیر کے لبنان کو تباہ کرنے سے متعلق بیان کی مذمت کرتے ہوئے کہا کہ یہ کسی عام انتہا پسند شخص کا بیان نہیں بلکہ اسرائیلی حکومت کے ایک اہم عہدیدار کا مؤقف ہے، جو خطے میں کشیدگی بڑھانے کا باعث بن رہا ہے۔

انہوں نے کہا کہ اسرائیل کی موجودہ پالیسی نہ صرف خطے بلکہ پوری انسانیت کے لیے خطرہ بنتی جا رہی ہے اور اس کا بنیادی مقصد مستقل تنازع اور جنگی ماحول کو برقرار رکھنا ہے۔

ادھر ایرانی وزارت خارجہ کے ترجمان اسماعیل بقائی نے بھی لبنان پر اسرائیلی حملوں کی مذمت کرتے ہوئے خبردار کیا کہ اسرائیلی کارروائیوں کے نتائج پورے خطے کو بھگتنا پڑ سکتے ہیں۔ انہوں نے کہا کہ ایران اپنے قومی مفادات اور اتحادیوں کے تحفظ کے لیے ہر ممکن اقدام کرے گا۔

تجزیہ کاروں کے مطابق امریکہ، ایران اور اسرائیل کے درمیان بڑھتی ہوئی لفظی جنگ مشرقِ وسطیٰ میں کشیدگی کو مزید بڑھا سکتی ہے، جبکہ لبنان کی صورتحال بھی علاقائی سلامتی کے لیے ایک اہم چیلنج بنتی جا رہی ہے۔