ایران امریکہ مذاکرات آج: شہباز شریف، فیلڈ مارشل عاصم منیر اور جے ڈی وینس کی اہم ملاقات، پاکستان کا امن عمل میں فعال کردار

سوئٹزرلینڈ میں جاری ایران اور امریکہ کے درمیان اہم مذاکرات کے موقع پر وزیراعظم شہباز شریف، فیلڈ مارشل عاصم منیر اور امریکی نائب صدر جے ڈی وینس کے درمیان اہم ملاقات ہوئی ہے، جس میں خطے کی صورتحال، امن عمل اور سفارتی تعاون پر تبادلہ خیال کیا گیا۔

ذرائع کے مطابق یہ ملاقات مذاکراتی مرکز برگن اسٹاک میں تکنیکی سطح کے مذاکرات کے دوران ہوئی، جس میں امریکی صدر کے خصوصی ایلچی سٹیو وٹکوف اور جیرڈ کشنر بھی شریک تھے۔ ملاقات خوشگوار ماحول میں ہوئی اور فریقین نے خطے میں امن و استحکام کے فروغ پر زور دیا۔

ملاقات کے دوران امریکی نائب صدر جے ڈی وینس نے امن عمل میں پاکستان کے کردار کو سراہتے ہوئے کہا کہ پاکستان نے خطے میں امن کے قیام کے لیے قابلِ قدر کردار ادا کیا ہے اور امریکہ پاکستان کے ساتھ تعلقات کو اہمیت دیتا ہے۔

ذرائع کے مطابق امریکی وفد سے ملاقات کے بعد وزیراعظم شہباز شریف ایرانی وفد سے بھی ملاقات کریں گے۔ ایرانی وفد کی قیادت ایرانی پارلیمنٹ کے اسپیکر باقر قالیباف کر رہے ہیں جبکہ وزیر خارجہ عباس عراقچی سمیت دیگر اعلیٰ حکام بھی وفد کا حصہ ہیں۔

ایران کی وزارت خارجہ کے ترجمان اسماعیل بقائی نے تصدیق کی ہے کہ ایرانی اور سوئس وزرائے خارجہ کے درمیان ملاقات طے شدہ سرکاری شیڈول کا حصہ تھی۔ انہوں نے بتایا کہ ایرانی وفد پاکستان اور قطر کے ساتھ بھی دوطرفہ مذاکرات کرے گا جبکہ امریکہ، ایران، پاکستان اور قطر کے درمیان چار فریقی مذاکرات بھی متوقع ہیں۔

دفتر خارجہ پاکستان کے مطابق وزیراعظم شہباز شریف اور فیلڈ مارشل عاصم منیر اعلیٰ سطحی وفد کے ہمراہ ایران اور امریکہ کے درمیان مذاکرات میں شرکت کے لیے سوئٹزرلینڈ پہنچ چکے ہیں۔ امریکہ، ایران اور قطر کے وفود بھی مذاکراتی عمل میں شریک ہیں۔

دفتر خارجہ نے اپنے بیان میں کہا ہے کہ پاکستان ایران اور امریکہ کے درمیان طے شدہ مفاہمت پر عملدرآمد اور اس کے فروغ کے لیے اپنا تعمیری کردار جاری رکھے گا۔ پاکستان خطے میں امن، استحکام اور سفارتی حل کی حمایت کرتا رہے گا۔

ترجمان دفتر خارجہ کے مطابق وزیراعظم شہباز شریف کی ایران، امریکہ، قطر اور سوئٹزرلینڈ کے وفود سے متعدد دوطرفہ ملاقاتیں بھی متوقع ہیں، جن میں پائیدار امن، علاقائی استحکام اور سفارتی تعاون کے فروغ پر گفتگو کی جائے گی۔

دفتر خارجہ کا کہنا ہے کہ بحران کے دوران پاکستان کی سہولت کاری متوازن، اصولی اور تعمیری سفارتکاری کی عکاس ہے۔ ابتدائی مذاکراتی مراحل کی میزبانی اور مسلسل سفارتی رابطوں نے دونوں ممالک کے درمیان مفاہمت کی راہ ہموار کرنے میں اہم کردار ادا کیا۔

دوسری جانب سوئس وزارت خارجہ نے پاکستانی وفد کا خیرمقدم کرتے ہوئے کہا ہے کہ پاکستان بطور ثالث ایران اور امریکہ کے درمیان مذاکراتی عمل میں اہم کردار ادا کر رہا ہے، جو خطے میں امن و استحکام کے لیے مثبت پیش رفت سمجھی جا رہی ہے۔