صدر ٹرمپ کا امیرِ قطر سے ٹیلیفونک رابطہ، خلیجی استحکام کے لیے مذاکرات پر زور

امریکی صدر ڈونلڈ ٹرمپ اور قطر کے امیر شیخ تمیم بن حمد آل ثانی کے درمیان ٹیلیفونک رابطہ ہوا، جس میں خطے کی تازہ صورتحال، کشیدگی میں کمی اور سفارتی کوششوں پر تبادلہ خیال کیا گیا۔

غیر ملکی خبر ایجنسی کے مطابق دونوں رہنماؤں نے مشرقِ وسطیٰ کی موجودہ صورتحال کا جائزہ لیتے ہوئے اس بات پر اتفاق کیا کہ خطے میں امن و استحکام کے لیے سفارتی ذرائع اور مذاکرات کو ترجیح دی جانی چاہیے۔

رپورٹ کے مطابق گفتگو کے دوران امریکا اور ایران کے درمیان جاری سفارتی رابطوں پر بھی بات چیت ہوئی، جبکہ واشنگٹن اور تہران کو مذاکرات کے ذریعے مزید قریب لانے کی کوششوں پر تبادلہ خیال کیا گیا۔

صدر ٹرمپ اور امیرِ قطر نے خلیجی خطے میں استحکام، سلامتی اور امن کے فروغ کے لیے مسلسل رابطوں اور سفارتی اقدامات کی اہمیت پر زور دیا۔ دونوں رہنماؤں نے اس عزم کا اظہار کیا کہ کشیدگی میں کمی اور علاقائی استحکام کے لیے بات چیت کا عمل جاری رہنا چاہیے۔

یہ رابطہ ایسے وقت میں ہوا ہے جب خطے میں سکیورٹی صورتحال، آبنائے ہرمز میں بحری آمدورفت اور ایران سے متعلق سفارتی سرگرمیاں عالمی توجہ کا مرکز بنی ہوئی ہیں۔