یورپی یونین کا بیان منافقانہ ہے ، امریکا سے جوہری پروگرام پر بات نہیں ہو رہی ، اسماعیل بقائی

(تہران)ایران کی وزارت خارجہ کے ترجمان اسماعیل بقائی نے کہا ہے کہ ایران ہمیشہ سفارت کاری کو ترجیح دیتا ہے، تاہم اپنے دفاع اور قومی سلامتی کے تحفظ کے لیے ہر ممکن اقدام کرنے کا حق محفوظ رکھتا ہے۔

پریس بریفنگ کے دوران اسماعیل بقائی نے یورپی یونین کے حالیہ مؤقف پر تنقید کرتے ہوئے کہا کہ ایران کے حقِ دفاع کے خلاف دیا گیا بیان "منافقانہ اور غیر ذمے دارانہ" ہے۔ انہوں نے کہا کہ ایران اپنے دفاع کے لیے ہمیشہ تیار رہتا ہے اور خطے میں امریکی اڈوں پر کی جانے والی کارروائیاں دفاعی نوعیت کی تھیں۔

ترجمان ایرانی وزارت خارجہ نے کہا کہ ایران کو کسی بھی جارحیت کے خلاف جوابی کارروائی کا مکمل حق حاصل ہے۔ انہوں نے خطے کی ریاستوں پر زور دیا کہ وہ اپنی سرزمین یا وسائل کو ایران کے خلاف حملوں کے لیے استعمال نہ ہونے دیں۔

اسماعیل بقائی نے ایرانی صدر مسعود پزشکیان کے استعفے سے متعلق گردش کرنے والی خبروں کو مسترد کرتے ہوئے کہا کہ ان اطلاعات میں کوئی صداقت نہیں اور حکومت پوری طرح اپنے فرائض انجام دے رہی ہے۔

انہوں نے مزید کہا کہ امریکا کے ساتھ کسی بھی ممکنہ معاہدے میں لبنان کا معاملہ لازمی طور پر شامل ہوگا۔ ان کے مطابق لبنان میں جنگ بندی امریکا کے ساتھ ہونے والے کسی بھی معاہدے کا اہم اور بنیادی حصہ ہوگی۔

ایرانی ترجمان نے واضح کیا کہ موجودہ مذاکرات میں ایرانی جوہری پروگرام زیر بحث نہیں ہے اور اس حوالے سے امریکا کے ساتھ کوئی بات چیت نہیں ہو رہی۔