آبنائے ہرمز سے تیل کی ترسیل جنگ سے پہلے کی سطح پر بحال، عالمی معیشت بہتر ہو رہی ہے: امریکی نائب صدر

(واشنگٹن) امریکی نائب صدر جے ڈی وینس نے کہا ہے کہ آبنائے ہرمز سے تیل کی ترسیل دوبارہ جنگ سے قبل کی سطح پر پہنچ چکی ہے، جو عالمی معیشت کی بحالی کی جانب ایک مثبت پیش رفت ہے۔

ایک بیان میں جے ڈی وینس نے کہا کہ اس وقت آبنائے ہرمز مکمل طور پر کھلی ہے اور وہاں سے بڑی مقدار میں تیل کی ترسیل جاری ہے۔ ان کے مطابق بعض دنوں میں جنگ شروع ہونے سے پہلے کے مقابلے میں بھی زیادہ مقدار میں تیل آبنائے ہرمز سے گزر رہا ہے۔

انہوں نے کہا کہ یہ صورتحال اس بات کی نشاندہی کرتی ہے کہ عالمی معیشت دوبارہ متحرک ہو رہی ہے۔ اگرچہ مکمل بحالی میں کچھ وقت لگے گا، تاہم تیل کی عالمی قیمتوں میں پہلے ہی نمایاں کمی دیکھی جا رہی ہے۔

امریکی نائب صدر کا کہنا تھا کہ لبنان اور اسرائیل کے درمیان امن معاہدے اور امریکہ و ایران کے درمیان مفاہمتی یادداشت کو ایک ساتھ دیکھا جائے تو دونوں کا بنیادی مقصد لبنان کی علاقائی سالمیت کا احترام اور خطے میں کشیدگی میں کمی ہے۔

جے ڈی وینس نے مزید کہا کہ ان معاہدوں پر مؤثر عمل درآمد سے نہ صرف توانائی کی ترسیل مزید مستحکم ہوگی بلکہ مشرقِ وسطیٰ میں علاقائی استحکام کو بھی فروغ ملنے کی توقع ہے۔