لیفٹیننٹ کرنل خالد حسین شہید کی نمازِ جنازہ ادا، اعلیٰ قیادت کی شرکت

(راولپنڈی)پاک فوج کے شعبہ تعلقات عامہ کے مطابق لیفٹیننٹ کرنل خالد حسین بلوچستان میں بھارتی سرپرستی میں دہشتگردوں کے خلاف انٹیلیجنس بیسڈ آپریشن کے دوران اپنے جوانوں کی قیادت کرتے ہوئے زخمی ہوئے اور بعد ازاں جامِ شہادت نوش کیا۔

نمازِ جنازہ میں وفاقی وزراء، سینئر فوجی افسران، ریٹائرڈ اہلکاروں، شہید کے اہلخانہ اور شہریوں کی بڑی تعداد نے شرکت کی اور شہید کو خراجِ عقیدت پیش کیا گیا۔

اس موقع پر وزیراعظم شہباز شریف نے لیفٹیننٹ کرنل خالد حسین کی بہادری، پیشہ ورانہ مہارت اور وطن کے دفاع کیلئے خدمات کو سراہتے ہوئے کہا کہ قوم اپنے شہداء کی قربانیوں کو کبھی فراموش نہیں کرے گی۔

انہوں نے کہا کہ پاکستان کی مسلح افواج قوم کی مکمل حمایت کے ساتھ دہشتگردی اور اس کے سہولت کاروں کے خاتمے کیلئے پُرعزم ہیں، اور شہداء کی قربانیاں قومی عزم کو مزید مضبوط بناتی ہیں۔

آئی ایس پی آر کے مطابق شہید افسر کو ان کے آبائی علاقے میں مکمل فوجی اعزاز کے ساتھ سپردِ خاک کیا جائے گا، جبکہ پاک افواج اور پوری قوم نے سوگوار خاندان سے دلی ہمدردی اور تعزیت کا اظہار کیا ہے۔