پاکستان اور کینیڈا کے درمیان تجارتی و سرمایہ کاری معاہدوں پر پیش رفت،اوٹاوا میں اعلیٰ سطحی مذاکرات

( اوٹاوا ) پاکستان اور کینیڈا کے درمیان تجارت اور سرمایہ کاری کے فروغ کے لیے اعلیٰ سطحی مذاکرات میں اہم پیش رفت سامنے آئی ہے۔ حکومتِ پاکستان کے سینئر حکام پر مشتمل ایک وفد نے اوٹاوا میں کینیڈا کے نائب وزیر برائے بین الاقوامی تجارت گلین پوروس سے ملاقات کی، جس میں دوطرفہ اقتصادی تعلقات کو مزید وسعت دینے پر تبادلہ خیال کیا گیا

پاکستانی ہائی کمیشن کی جانب سے جاری کردہ پریس ریلیز کے مطابق پاکستانی وفد اس وقت کینیڈا کے دورے پر ہے جہاں دونوں ممالک کے درمیان پاکستان-کینیڈا فارن ٹریڈ پروموشن اینڈ پروٹیکشن ایگریمنٹ اور پاکستان-کینیڈا بائی لیٹرل انویسٹمنٹ ٹریٹی (FIPPA/BIT) کے مسودوں پر مذاکرات جاری ہیں

ملاقات کے دوران دونوں فریقوں نے تجارت، سرمایہ کاری اور اقتصادی تعاون کے موجودہ شعبوں کا جائزہ لیا اور اس بات پر اتفاق کیا کہ پاکستان اور کینیڈا کے درمیان تجارتی حجم اور سرمایہ کاری میں اضافے کے وسیع مواقع موجود ہیں جن سے ابھی مکمل طور پر فائدہ نہیں اٹھایا گیا

حکام کا کہنا ہے کہ مجوزہ معاہدوں کا مقصد سرمایہ کاروں کو بہتر قانونی تحفظ فراہم کرنا، دوطرفہ سرمایہ کاری کی حوصلہ افزائی کرنا اور دونوں ممالک کے درمیان تجارتی روابط کو مزید مستحکم بنانا ہے۔

ماہرین کے مطابق اگر یہ معاہدے حتمی شکل اختیار کر لیتے ہیں تو پاکستان اور کینیڈا کے درمیان اقتصادی تعاون کے ایک نئے دور کا آغاز ہو سکتا ہے، جس سے تجارت، سرمایہ کاری اور کاروباری شراکت داری کے مواقع میں نمایاں اضافہ متوقع ہے۔