وزیراعظم شہباز شریف کا دورہ سوئٹزرلینڈ منسوخ

اسلام آباد: وزیراعظم شہباز شریف نے سوئٹزرلینڈ کا مجوزہ دورہ منسوخ کر دیا ہے، جبکہ پاکستان نے ایران اور امریکا کے درمیان جاری مذاکراتی عمل میں اپنا ثالثی کردار برقرار رکھنے کا فیصلہ کیا ہے۔

سفارتی ذرائع کے مطابق وزیراعظم شہباز شریف نے آج سوئٹزرلینڈ روانہ ہونا تھا، تاہم تازہ سفارتی پیش رفت کے بعد یہ دورہ منسوخ کر دیا گیا ہے۔

ذرائع کا کہنا ہے کہ مذاکراتی عمل آئندہ 60 روز تک جاری رہے گا اور اس دوران پاکستان فریقین کے درمیان رابطوں اور اعتماد سازی کے اقدامات میں اپنا فعال کردار ادا کرتا رہے گا۔

سفارتی ذرائع کے مطابق امریکی صدر Donald Trump کی جانب سے الیکٹرانک دستخط کیے جانے کے بعد سوئٹزرلینڈ میں ہونے والی مجوزہ ملاقات کی ضرورت باقی نہیں رہی، جس کے باعث متعلقہ سفارتی سرگرمیاں بھی منسوخ کر دی گئی ہیں۔

ذرائع نے مزید بتایا کہ پاکستان خطے میں امن، استحکام اور سفارتی حل کے فروغ کے لیے اپنی کوششیں جاری رکھے گا اور مذاکرات کے اگلے مراحل میں بھی سہولت کار کے طور پر کردار ادا کرے گا۔

حکومتی حلقوں کے مطابق حالیہ پیش رفت سے مذاکراتی عمل کو تقویت ملے گی اور آئندہ ہفتوں میں تکنیکی اور سفارتی سطح پر مزید رابطے متوقع ہیں، جن کا مقصد طے شدہ امور پر عمل درآمد کو یقینی بنانا ہے۔