چینی صدر کی آبنائے ہرمز کھولنے میں مدد کی پیشکش، ٹرمپ کا بڑا دعویٰ

(بیجنگ) دورۂ چین پر موجود امریکی صدر ڈونلڈ ٹرمپ نے دعویٰ کیا ہے کہ چینی صدر شی جن پنگ نے آبنائے ہرمز کھولنے میں مدد کی پیشکش کی ہے اور ایران امریکا تنازع میں کردار ادا کرنے کی خواہش ظاہر کی ہے۔

ٹی وی انٹرویو میں گفتگو کرتے ہوئے ڈونلڈ ٹرمپ نے کہا کہ چینی صدر نے واضح کیا کہ اگر ایران کے معاملے پر کوئی مدد درکار ہوئی تو چین تعاون کے لیے تیار ہے۔ ٹرمپ کے مطابق چین ایران سے بڑی مقدار میں تیل خریدتا ہے اور وہ چاہتا ہے کہ یہ سلسلہ جاری رہے۔

امریکی صدر نے کہا کہ چین آبنائے ہرمز کو کھلا دیکھنا چاہتا ہے کیونکہ عالمی تجارت اور تیل کی ترسیل کے لیے اس کی اہمیت انتہائی زیادہ ہے۔ انہوں نے مزید کہا کہ شی جن پنگ ایران اور امریکا کے درمیان معاہدہ ہوتے دیکھنے کے خواہاں ہیں۔

ڈونلڈ ٹرمپ نے یہ بھی دعویٰ کیا کہ چین ایران کو فوجی سازوسامان فراہم نہیں کرے گا، جبکہ چین نے 200 بوئنگ طیارے خریدنے پر بھی اتفاق کیا ہے۔

اس سے قبل بیجنگ کے گریٹ ہال آف دی پیپل میں امریکی صدر کے اعزاز میں دیے گئے عشائیے سے خطاب کرتے ہوئے چینی صدر شی جن پنگ نے امریکا کو ایک بار پھر شراکت داری کی پیشکش کی۔

شی جن پنگ کا کہنا تھا کہ چین اور امریکا دو عظیم قومیں ہیں اور دونوں ممالک کو حریف کے بجائے شراکت دار ہونا چاہیے۔ انہوں نے کہا کہ صدر ٹرمپ کا “امریکا کو دوبارہ عظیم بنانے” کا وژن چینی ترقی کے ساتھ ہم آہنگ ہے۔

چینی صدر نے دوطرفہ احترام اور تعاون پر مبنی تعلقات کو دونوں ممالک کے مستقبل کے لیے اہم قرار دیا۔