میری لینڈ میں پروقار تقریب، پریس قونصلر سرفراز حسین کو شاندار الوداع، زوبیہ مسعود کا پرتپاک استقبال

(الیکاٹ سٹی، میری لینڈ )امریکی ریاست میری لینڈ کے شہر الیکاٹ سٹی میں پاکستانی سفارت خانے کے سبکدوش ہونے والے پریس قونصلر سرفراز حسین کے اعزاز میں الوداعی جبکہ نئی تعینات ہونے والی پریس قونصلر زوبیہ مسعود کے استقبال میں ایک پروقار تقریب منعقد کی گئی۔ اس تقریب کا اہتمام شہر کی معروف ادبی شخصیت بینا گوئیندی نے اپنی رہائش گاہ پر کیا۔

تقریب میں امریکہ میں پاکستان کے سفیر شیخ رضوان سعید نے بطور مہمانِ خصوصی شرکت کی۔ اس موقع پر سرفراز حسین، زوبیہ مسعود، صحافیوں، ادیبوں، شاعروں اور پاکستانی نژاد امریکیوں کی بڑی تعداد بھی موجود تھی۔

مقررین نے اپنے خطاب میں سرفراز حسین کی بطور پریس قونصلر خدمات کو زبردست خراجِ تحسین پیش کرتے ہوئے کہا کہ انہوں نے پاکستانی کمیونٹی اور میڈیا کے درمیان روابط کو مضبوط بنانے میں نمایاں کردار ادا کیا۔ شرکاء نے زوبیہ مسعود کو نئی ذمہ داریاں سنبھالنے پر مبارکباد دیتے ہوئے ان کے لیے نیک خواہشات کا اظہار کیا اور امید ظاہر کی کہ وہ بھی کمیونٹی اور میڈیا کے ساتھ مؤثر اور فعال انداز میں کام کریں گی۔ زوبیہ مسعود اس سے پہلے بھی واشنگٹن ڈی سی میں پریس اتاشی کے طور ہر فرائض انجام دے چکی ہیں۔

تقریب کے اختتام پر ایک خوبصورت مشاعرہ بھی منعقد ہوا جس نے محفل کو مزید یادگار بنا دیا۔ مشاعرے میں بینا گوئنڈی، پاکستان کے سفیر شیخ رضوان سعید، سرفراز حسین اور دیگر شعراء و ادبی شخصیات نے اپنا کلام پیش کیا، جسے حاضرین نے بھرپور داد سے نوازا۔

تقریب خوشگوار ماحول، باہمی محبت، ادبی رنگ اور پاکستانی ثقافت کے حسین امتزاج کے ساتھ اختتام پذیر ہوئی۔ شرکاء نے اس عزم کا اظہار کیا کہ وہ مستقبل میں بھی پاکستانی کمیونٹی کے اتحاد، ثقافتی فروغ اور پاکستان اور امریکہ کے درمیان دوستانہ تعلقات کو مزید مضبوط بنانے کے لیے اپنا کردار ادا کرتے رہیں گے۔