امریکا میں متنازعہ ملاقاتیں مہنگی پڑ گئیں، وزیراعظم ہاؤس میں احسن اقبال کی طلبی، سخت بازپرس

(اسلام آباد) وزیراعظم شہباز شریف نے امریکا میں متنازعہ سیاسی ملاقاتوں پر وفاقی وزیر احسن اقبال کو وزیراعظم ہاؤس طلب کرکے سخت بازپرس کی اور آئندہ کسی بھی بیرونِ ملک دورے سے قبل اعلیٰ قیادت سے باقاعدہ اجازت اور مشاورت کی ہدایت کردی۔

ذرائع کے مطابق وزیراعظم نے احسن اقبال سے ان کے حالیہ دورۂ امریکا کے دوران ہونے والی ملاقاتوں پر تفصیلی وضاحت طلب کی۔ ذرائع کا کہنا ہے کہ وزیراعظم نے واضح کیا کہ ایسے حساس نوعیت کے بیرونی روابط حکومتی پالیسی اور سفارتی مفادات کے مطابق ہونے چاہییں

ذرائع کے مطابق احسن اقبال نے اپنے دورۂ امریکا کے دوران امریکی صدر ڈونلڈ ٹرمپ کے سخت ناقد اور ڈیموکریٹ رکن کانگریس ال گرین سے ملاقات کی، جس پر ری پبلکن حلقوں کی جانب سے اعتراضات سامنے آئے۔ بتایا جاتا ہے کہ یہ ملاقات ہیوسٹن میں ایک تقریب کے دوران ہوئی، جس کے منتظم ایک متنازع پاکستانی نژاد کاروباری شخصیت تھے جو ماضی میں بھی اپنے ذاتی مفادات کیلئے حکومت پاکستان کو شدید نقصانات پہنچا چکے ہیں

احسن اقبال نے شکاگو کے میئر برینڈن جانسن سے بھی ملاقات کی، جو صدر ٹرمپ پر اپنی سخت تنقید اور سیاسی مخالفت کے باعث شہرت رکھتے ہیں

ذرائع کے مطابق وزیراعظم شہباز شریف نے ان ملاقاتوں پر ناراضی کا اظہار کرتے ہوئے ہدایت کی کہ مستقبل میں کوئی بھی وفاقی وزیر بیرونِ ملک دورے یا اہم سیاسی شخصیات سے ملاقات سے قبل اعلیٰ قیادت سے منظوری اور مشاورت کو یقینی بنائے

ذرائع نے یہ بھی دعویٰ کیا ہے کہ احسن اقبال کا دورۂ امریکا سرکاری نہیں بلکہ ذاتی نوعیت کا تھا، تاہم اس دوران حکومتی نمائندے کے طور پر ملاقاتیں کرنے پر پروٹوکول اور سفارتی ضابطوں سے متعلق سوالات بھی اٹھائے گئے ہیں