ہیلری کلنٹن کی ٹرمپ انتظامیہ پر کڑی تنقید، امریکا کو خطرناک ملک قرار دے دیا

واشنگٹن: سابق امریکی وزیر خارجہ ہیلری کلنٹن نے موجودہ امریکی پالیسیوں پر شدید تنقید کرتے ہوئے کہا ہے کہ امریکا اب ایک سنجیدہ ملک نہیں بلکہ خطرناک ملک بن چکا ہے اور وہ اپنے بہترین دوستوں کو بھی دھمکیاں دے رہا ہے۔

ہیلری کلنٹن نے اپنے بیان میں کہا کہ موجودہ امریکی پالیسیوں کے باعث دنیا امریکا کے خلاف ہوتی جا رہی ہے۔ ان کے مطابق واشنگٹن کے حالیہ اقدامات نے عالمی سطح پر امریکا کے دوست ممالک میں بھی تشویش پیدا کردی ہے۔

سابق امریکی وزیر خارجہ نے اسرائیلی وزیراعظم بنیامین نیتن یاہو کی حکومت اور اس کی پالیسیوں پر بھی سخت تنقید کی۔ انہوں نے کہا کہ انہیں نیتن یاہو کی حکومت اور اس کی پالیسیوں سے نفرت ہے۔

ہیلری کلنٹن نے امریکی صدر ڈونلڈ ٹرمپ پر بھی شدید الزامات عائد کرتے ہوئے انہیں جھوٹ بولنے کا چیمپئن قرار دیا اور کہا کہ صدر ٹرمپ ہر چیز کے بارے میں جھوٹ بولتے ہیں۔

انہوں نے اسرائیلی حکومت پر زور دیا کہ وہ مغربی کنارے میں اسرائیلی آبادکاروں کے خلاف سخت کارروائی کرے۔

ہیلری کلنٹن کے بیان کے بعد امریکی خارجہ پالیسی، اسرائیل سے متعلق واشنگٹن کے مؤقف اور خطے میں جاری کشیدگی کے حوالے سے سیاسی بحث مزید شدت اختیار کر سکتی ہے۔