شہباز شریف سے محسن نقوی کی ملاقات، تہران دورے اور سیکیورٹی امور پر مشاورت

(اسلام آباد) وزیراعظم محمد شہباز شریف سے وفاقی وزیر داخلہ سید محسن نقوی نے لاہور میں ملاقات کی، جس میں ملکی سیکیورٹی صورتحال، امن و امان کے امور اور وزیر داخلہ کے آئندہ تہران دورے سے متعلق اہم مشاورت کی گئی۔

وزیراعظم آفس کی جانب سے جاری اعلامیے کے مطابق محسن نقوی نے وزیراعظم کو کرغستان کے دارالحکومت بشکیک میں منعقدہ شنگھائی تعاون تنظیم کانفرنس کے موقع پر ہونے والی اپنی مختلف اہم ملاقاتوں سے آگاہ کیا۔

ملاقات کے دوران وزیر داخلہ کے آئندہ تہران دورے پر بھی تفصیلی تبادلہ خیال کیا گیا۔ وزیراعظم شہباز شریف نے دورے کے حوالے سے ضروری رہنمائی فراہم کی اور پاکستان کے سفارتی و علاقائی مفادات کے تناظر میں مختلف امور پر مشورے دیے۔

اعلامیے کے مطابق وزیراعظم اور وزیر داخلہ نے ملک کی مجموعی امن و امان اور سیکیورٹی صورتحال کا بھی جائزہ لیا۔ محسن نقوی نے وزیراعظم کو شہریوں کے تحفظ اور ملک میں امن و امان کے قیام کے لیے کیے جانے والے اقدامات پر بریفنگ دی۔

وزیراعظم شہباز شریف نے اس موقع پر ملک میں سیکیورٹی کو مزید مؤثر بنانے اور امن و امان کی صورتحال کو مستحکم رکھنے کے لیے تمام متعلقہ اداروں کے درمیان قریبی رابطے، مؤثر تعاون اور مربوط حکمت عملی کی ضرورت پر زور دیا۔

ملاقات میں داخلی سلامتی سے متعلق امور اور قومی سطح پر امن کے قیام کے لیے جاری اقدامات پر بھی تبادلہ خیال کیا گیا۔