ایران پر پابندیوں میں نرمی آبنائے ہرمز کھولنے سے مشروط نہیں، افزودہ یورینیم پر مذاکرات بھی ضروری: مارکو روبیو

امریکی وزیر خارجہ مارکو روبیو نے کہا ہے کہ ایران پر عائد پابندیوں میں نرمی صرف آبنائے ہرمز کھولنے سے ممکن نہیں ہوگی بلکہ تہران کو اپنے افزودہ یورینیم پروگرام پر بھی مذاکرات کے لیے آمادگی ظاہر کرنا ہوگی۔

سینیٹ فارن ریلیشنز کمیٹی میں پیشی کے دوران مارکو روبیو نے بجٹ، ایران اور خطے کی صورتحال سے متعلق سوالات کے جوابات دیتے ہوئے کہا کہ امریکا اب بھی دنیا کی واحد عالمی طاقت ہے اور اس طاقت کو امریکی عوام کے تحفظ کے لیے استعمال کیا جانا چاہیے۔

انہوں نے دعویٰ کیا کہ ایران کے خلاف "آپریشن ایپک فیوری" انتہائی کامیاب رہا اور امریکا نے اپنے تمام فوجی اہداف حاصل کیے۔ ان کے مطابق اس کارروائی سے ایران کی دفاعی صلاحیت کو نمایاں حد تک کمزور کیا گیا۔

مارکو روبیو نے کہا کہ ایران کے ساتھ کسی بھی ممکنہ مذاکرات کی پہلی شرط آبنائے ہرمز کو کھولنا ہے۔ ان کا کہنا تھا کہ ایران کو واضح طور پر اعلان کرنا ہوگا کہ آبنائے ہرمز بحری آمد و رفت کے لیے مکمل طور پر کھلی ہے۔

امریکی وزیر خارجہ نے مزید کہا کہ ایسے اشارے موصول ہوئے ہیں کہ ایران کے سپریم لیڈر اب معاملات میں زیادہ فعال کردار ادا کر رہے ہیں، جس سے مستقبل میں مذاکرات کی راہ ہموار ہوسکتی ہے۔ تاہم انہوں نے واضح کیا کہ پابندیوں میں نرمی کے لیے ایران کو متعدد شرائط پوری کرنا ہوں گی، جن میں افزودہ یورینیم کے معاملے پر بات چیت بھی شامل ہے۔

انہوں نے یہ بھی کہا کہ ایران کی جانب سے آبنائے ہرمز بند کرنے کی کوششوں کے جواب میں امریکا نے ناکہ بندی کی، جس کے نتیجے میں ایران کو روزانہ لاکھوں ڈالر کا مالی نقصان برداشت کرنا پڑ رہا ہے۔

مارکو روبیو کے مطابق ایران اب اپنے ایٹمی پروگرام پر بات چیت کے لیے تیار دکھائی دیتا ہے، حالانکہ کچھ عرصہ قبل تک تہران اس موضوع پر بات کرنے سے بھی گریز کرتا تھا۔ تاہم انہوں نے خبردار کیا کہ یہ پیش رفت کسی حتمی اور قابل قبول معاہدے کی ضمانت نہیں ہے۔